首頁 > 每月專題
2016最完全錯哂藝術事件年度回顧
TumTum  |  tumtumhk@gmail.com
字體提高 縮小字體 列印 電子郵件 報告
確認 2016.12.30  15:12:12
Twitter Faecbook Google msn

 當代藝術界今年令人興奮正面嘅事真係唔係好多,相反完全錯哂嘅藝術事件就層出不窮。唔好話我地負皮,下面係我地嚴格選出嘅2016最完全錯哂藝術事件,睇下就知我地唔係亂噏啦:

第八位

   
   
 

五月係台灣舉行嘅「福爾摩沙101國際藝術博覽會」,裡面有一件充氣裝置作品「No.86」,由藝術家王德瑜創作,作品歡迎觀眾同佢「互動」。但點知俾個年約50歲嘅李姓阿叔「互動」咗一野就出事啦。阿叔唔知做咗啲乜嘢,佢攪咗兩攪就KO咗件作品,目擊者話佢當時對住件作品:「衝撞、猛撲」,然後一聲巨響,件作品就爆咗。

阿叔見瀨嘢,留低咗聯絡電話就走咗。藝術家見到咁嘅場面都嚇一嚇,話佢有件類似嘅作品係北美館兒童藝術中心展出,俾啲細路「互動」咗半年都無事,阿叔一野就整爆,於是藝術家就報警兼向阿叔追討賠償。

咁阿叔初初都肯講Sorry嘅,但係當知道淨係賠製作成本嘅價錢時,即刻一秒唔認數,話畫廊人員唔應該邀請佢同作品「互動」,當件作品爆開時佢都跌咗落地整親膝頭,都未叫佢地賠醫藥費,最後重好嬲嬲豬咁走咗添添。藝術家同畫廊話由於阿叔毫無悔意,決定告到佢甩褲咁話。

所以話,大家見到吹氣嘢時唔好咁興奮,隨時俾人告到一身蟻。

第七位

   
   
   
 

法國藝術家Orlan控告Lady Gaga係佢2011年專輯Born This Way抄襲Orlan嘅形象同多件作品,要Gaga賠3千1百70萬美元俾佢。嗱睇落成件事都係Gaga抄緊Orlan,但係法庭判決又真係估佢唔到。

巴黎法庭係上個月判Orlan敗訴,Orlan要賠17萬港元俾Gaga,咦?點解你抄我仲要我賠錢俾你?呢個問題又真係無人答到。不過Orlan都唔氣餒,佢講明會上訴,而佢佢亦係美國告咗Gaga。呢云真係鄧Orlan擔心,Gaga同唱片公司財雄勢大,隨時輸到底褲都要買埋,希望Orlan好運啦。

第六位

   
   
 

十月係德國紐倫堡新博物館有一個「長者藝遊團」參觀,其中一位團員,91歲阿婆Hannelore K.見到展品中有一個填字遊戲,手痕起上黎就係畫布上填起上黎。

件作品係德國藝術家兼Fluxus成員Arthur Koepcke1965年創作嘅Reading-Work Piece系列嘅「閱讀習作NO.40:填入」,阿婆話「指示」明明叫佢「填入」,佢照做無理由錯駕。但係美術館館長話:「我地都知阿婆唔係有心破壞藝術品,但係我地係一間國營美術館,而件作品又值8萬8千歐羅,我地係一定要報警駕。」

「長者藝遊團」領隊話成個美術館鬼死咁多互動嘅嘢,呢幅畫又叫「填入」,好混亂啫,唔想人填就應該楝個牌出黎講清楚,咁樣誤導阿婆好唔應該。

而家美術館已經將幅畫清潔咗,但係阿婆個律師話阿婆有嗰啲字嘅版權,因為阿婆嘅字,而家幅畫以至美術館都爆紅咗,咁美術館一個唔該抹走哂佢嘅大作,點計數先?而家件case重打緊官司。

第五位

   
   
   
 

自從現代藝術興起,好多藝術都用非傳統嘅方式創作,我地都習以為常。但係歐盟自己就將藝術定義咗,佢地可能唔知乜嘢係藝術,但係佢地就可以肯定乜嘢唔係藝術咁話。

例如國際知名用光管做藝術嘅已故大師Dan Flavin,人人都話佢啲作品勁,但係歐盟就話Flavin作品有「照明燈具的特點......,因此被歸類為...牆上照明裝置」。佢地中意點up本來都無乜所謂,但係歐盟定義Flavin嘅作品唔係藝術品時,入口到歐盟嘅Flavin作品就要交20%稅(藝術品只需交交5%稅)!

受影響嘅唔只係已故大師作品,連在生藝術家都影響埋,例如著名錄像藝術家Bill Viola嘅作品都唔算係藝術品,因為:「裝置本身唔係藝術,而係由佢進行的操作(光效應)的結果構成“藝術作品”」。

咁樣一黎就大件事,因為倫敦聖保羅大教堂舊年請Bill Viola創作兩件作品,預計出年完成。但係而家歐盟認定佢啲作品唔係藝術品,係明年1月1日開始就要交多15%稅。咁都好大鑊駕。

所以話英國人想脫歐都唔係無原因,連乜嘢係藝術都唔到自己話事。

第四位

   
   
 

今年邁阿密Art Basel係開幕時一間畫廊就好霸氣咁嚇大家一下。話說佢地展出Jeff Koons嘅「氣球狗」,但係件作品突然「無啦啦」咁跌咗落地,件作品係瓷器做,所以嘭一聲就散哂。

件作品已經出咗名脆弱駕啦,專買呢件作品嘅畫廊已經有說明書教你唔可以點處理佢,佢地話:
1) 一定要帶手套先可以掂佢,千奇唔好就咁用手掂呀。
2) 就算帶手套都只可以掂個邊,如果真係手痕掂咗件作品,可以用乾布同水抺番乾淨,千奇唔可以用洗潔精!
3) 唔可以放係太陽底下。
4) 你買咗件作品之後,有任何問題都唔關畫廊事,千奇唔好再揾我地。

講到咁脆弱,而你重肯用九千蚊美元買嘅話,未拎番到屋企就爛咗就唔怪得人啦。不過今次連畫廊都係大家面前示範點打爛「氣球狗」就真係夠哂經典囉。

第三位

   
   
 

韓國警察經過一年調查懷疑十三幅假李禺煥作品,終於拘捕咗一個洪姓嘅「偽術家」,經盤問後佢承認咁多年黎畫咗大概五十幅假嘅李禺煥作品,而呢啲作品已經經過大型畫廊同拍賣會係市場上流通。警方亦拘捕咗一啲畫廊負責人,係準備控告佢地畫同賣假畫時,大家諗住去問下呢位八十歳嘅大師意見,點知李禺煥攞個放大鏡研究咗呢啲「假畫」一輪後,竟然話:「唔係喎,呢啲畫係我畫嗰喎。」

大師咁講,啲警察呢回都唔知點算好,成件案已經捉到犯人同同謀,而且佢地都認哂罪,而家反而係「受害人」話無事發生,咁究竟告唔告佢地好呢?

萬一大家唔知,李禺煥係韓國八十年代神級藝術家,佢創立咗襌宗簡約畫派,可以話係八十年代亞洲藝術最重要嘅代表,而家佢每件作品都值數以百萬計,所以假畫事件對韓國以至亞洲藝術市場都有好大影響。

呢件事引起韓國藝術界極大迴響,好多(尤其年輕)藝術家都係網上圍插李禺煥,話佢老到儍下儍下,俾啲畫廊同拍賣會人氹下就食咗隻死貓,明明啲畫唔係佢畫都夾硬認係自己畫。老人家以為息寧人,點知害到好多唔似佢已經上咗岸嘅藝術家,大家要求藝術界尊重同保護原創,唔好俾啲奸嘅畫廊拍賣會賣假畫圖利。

呢件事攪到唔知點收科,尤其是國際市場對同類嘅韓國單色畫派開始注目,呀大師而家認啲畫係假貨又瀨嘢,繼續死撐係真嘢都瀨,真係隨時短幾年命就大鑊啦,大師真係要保重身體呀。

第二位

   
   
   
   
 

人類對自拍呢家嘢真係去到不惜一切嘅地步,十一月係葡萄牙里斯本國立古代美術館裡面,有一位來自巴西嘅遊客,諗住係十八世紀「天使長米高」嘅雕塑面前自拍,咁佢諗住就番個靚角度,點知褪下褪下,一野撞冧咗個雕塑。個雕塑棚一聲跌落地成個散哂,係個展廳裡面嘅遊客同保安都一齊O哂嘴,全場鴉雀無聲,望住一地殘骸,遊客立即將呢個景象上傳到社交媒體,我地肯定美術館館長係全世界最後一個人知道呢件事。阿館長話「我係美術館服務多年,都係第一次遇到咁嘅事…雕塑受損非常嚴重,但係都唔係無得救嘅。」嗱館長話整得番就得啦。

唔知係咪啲人係葡萄牙特別中意高難度自拍,今年5月,一條友爬上里斯本火車站外嘅牆,諗住同葡萄牙第16任國王「塞巴斯提安」雕塑自拍,結果將呢件有126年歷史嘅雕塑整冧咗碎到一地都係…唉⋯自拍真係毀滅人類文明嘅元兇。

第一位

   
   
   
   
 

今年1月係國際知名嘅紐約MOMA美術館,有位參觀嘅人士唔小心跌咗隻手套落地,結果所有好高質素嘅美術館參觀者突然變得好緊張,以為隻手套係藝術品,驚唔小心踩到就大鑊,我地唔排除有啲人會細心欣賞讚嘆一番。

另外,今年5月係三藩市現代美術館,有人將一副眼鏡放係地上面,又即刻引黎觀眾讚嘆,又影相又自拍咁。之後有兩個人認頭話其實佢地係度做緊個社會實驗,咁呢個實驗咪完全證實到嗰啲所謂藝術愛好者都係跟紅頂白,羊群心態到無知嘅地步囉。

唉⋯我地只可以概嘆人類文明嘅悲哀⋯一句講哂:so sad。

閱讀更多TumTum的文章  
字體提高 縮小字體 列印 電子郵件 報告
Twitter Facebook Google msn 後面 安慰
網上畫廊
人氣文章
使用條款及免責聲明私隱政策聯絡我們廣告查詢
香港柴灣柴灣道238號青年廣場9樓918室  |  電話 : (852)2858-1771  |  傳真 : (852)2736-6361
電郵:tumtum.hk@gmail.com  |  版權 © 本網站所有訊息資料受香港版權法保護,未經許可不得擅自複製,分發,傳播或發行。