首頁 > 每月專題
2016全年藝術界之最年度回顧
TumTum  |  tumtumhk@gmail.com
字體提高 縮小字體 列印 電子郵件 報告
確認 2016.12.31  19:40:41
Twitter Faecbook Google msn

藝術界經過呢幾年嘅洗禮,自拍幾幅相係藝術、痾督尿係藝術、而家連放個屁都係藝術,我諗大家都已經吓都廢事吓一聲。今年藝術界嘅主題應該係「請你估下咁樣算唔算藝術?」藝術家造出黎嘅藝術同玩嘢扮藝術家嘅惡攪藝術跟本無分別,反而好多上咗岸嘅出名藝術家都回歸畫畫,係咪代表藝術界覺得當代藝術已經「著地」到太「離地」呢?都係講番全年藝術界之最:

最乜都唔使做就可以做概念藝術家嘅方法

會唔會覺得有時啲「藝術人」講嘢懶深奧,初初聽以為佢好勁,點知返屋企諗咗幾日先發覺原來佢係度吹水唔抺咀,啲嘢廢過廢柴。假如你想好似佢地咁開口埋口都係啲好似好勁嘅廢話,呢個叫artybollocks generator嘅網頁可以真正幫到你,你只需㩒一下滑鼠,佢就會自動幫你隨機整篇Artist Statement出黎,包保你睇一次唔明佢講乜,只覺得好勁。

我地試過,真係幾得喎,以下係佢gen出黎嘅Artist Statement:

「我的作品探討多元文化和素食道德之間的關係。隨著卡夫卡和約翰·凱奇等對世界的影響力,新的見解是從顯性和隱性的對話合成。

自從我是一個十幾歲的我已經被人類生存條件無盡的振盪著迷。什麼開始作為希望不久就會巧妙到失敗的悲劇,只留下了什麼本來意義,並有了新的認識的可能性。

隨著時間的衍生品變得瘋狂,通過多樣的實踐澄清,觀眾留下了讚揚我們的世界的界限。」

係咪掂呀,可惜佢地無中文,各位藝術家/藝術學生/藝評人快啲Bookmark呢一頁啦,咁正嘅嘢一定要公諸同好,香港嘅藝術文字質素終於有機會提升啦,幾興奮?

而同一網頁重會幫藝術家發證書,到時唔好話無人賞識你啦。

   
   
 


最能彰顯公義嘅藝術官司

徹底演繹「反轉豬肚就係屎」嘅藝術界代表首推行為藝術一姐Marina Abramović同前「孖生連體十年」嘅「愛人」Ulay,呢對金童玉女自從係長城分手後就不相往來兼憎死對方。Marina將佢地十幾年一齊創作作品嘅版權獨霸咗,咁多年黎只係俾雞碎咁多「版權費」Ulay,將自己打造成「行為藝術之母」。Ulay之前出咗本自傳,但Marina點都唔俾Ulay用佢地以前作品嘅相,激到Ulay係原來想放相嘅地方放個粉紅色方格抗議,結果成本書多數相都變成粉紅色方格,激死Marina。

Ulay嬲嬲地走去告Marina,結果一年嘅官司之後終於有結果,Ulay這贏咗官司,荷蘭法庭裁定佢兩個人以前嘅作品版權屬於兩人共同擁有,Marina要賠25萬歐羅俾Ulay,加埋2萬3千歐羅頌費。

要同有財有勢有power嘅Marina打官司真係唔容易,加上11年確診患上癌症,Ulay話:「我嘅癌症積極地危及我嘅生命,同阿布拉莫維奇嘅大規模法律戰直接威脅我嘅存在」,真係慘慘豬,而家贏咗官司算還佢一個公道。係佢地1976至1980年作品要註名「Ulay/Abramović」,而1981至1988年作品就要註名「Abramović/Ulay」。至於Marina嗰邊,就無人回應。

   
   
 


最唔得罪得但人人都想得罪嘅人物

特朗普而家係美國選贏總統,成年勢頭可謂一時無兩,但係佢啲歧視言論真係唔係個個受得了。藝術家Illma Gore就係二月畫咗張特朗普嘅畫,裡面嘅特朗普有條十分之細小嘅J,佢話一個咁對自己嘅形象同聲譽睇得咁重嘅人,細J會令佢面對自己咁話。

點知佢放咗幅畫上Facebook後一個人群組後就俾Facebook停咗佢個account,話佢違反咗公眾對裸露嘅標準,重話可能Ban Illma一世添。而且Illma重收到特朗普律師團嘅信,話可能告佢咁話。

Illma想將幅畫放上ebay賣,點知同樣多次被下𣕧,又係話佢違反裸露藝術條款。

睇黎Illma真係幾到point,特朗普真係好介意人地話佢細J。

   
   
▲ Illma Gore

最無辜嘅著草偽術家

73歲嘅錢培琛係四十年前由上海移民到美國,諗住紐約係藝術中心,去到一定有得發圍。點知去到紐約人生路不熟,言語又唔係好通,阿錢生最後唯有係街頭賣畫維生。

係十五年前,突然有個叫Giafira Rosales嘅人請阿錢生幫佢地畫名師仿製畫,每張得到5000美元嘅報酬。阿錢生雖然姓錢,但係最無嘅就係錢,有呢啲錢無理由唔賺。鄰居話嗰時開始成日見到架名貴房車泊係佢屋企門口,然後有人拎住幅好似好名貴嘅畫入去阿錢生屋企。

點知原來呢任間畫廊Giafira小姐透過一間有165年歷史嘅Knoedler畫廊,將呢啲仿製畫當真畫賣,咁多年黎經呢間畫廊賣出咗40幅總共值6300萬美元嘅假畫,其他渠道加埋有8000萬美元。被阿錢生仿製嘅藝術家有Jackson Pollock、Willem de Kooning、Mark Rothko、Franz Kline、Robert Motherwell等大師作品。

自從Giafira小姐俾差人拉咗,告佢行騙之後,攪到Knoedler畫廊都執埋。阿錢生就嚇到鼻哥窿都無肉,雖然差人話阿錢生無犯罪,因為畫仿製畫係無罪,賣假畫先有罪,而無證據顯示阿錢生係有企圖畫假畫。但係近月阿錢生同老婆都失咗踪,睇黎係著咗草返大陸避風頭。

問下阿錢生啲多年同鄉朋友兼藝術家張生點睇?阿張生驚訝咁話:「識咗佢咁多年都唔知佢咁好技術,仿製咁多名家作品都無人睇得出,真係要俾個like。」

   
   
▲ Giafira Rosales

最血腥嘅藝術事件

俄羅斯駐土耳其大使Andrey Karlov十二月十九日在一畫廊為俄羅斯領事館主辦的攝影展開幕致詞時,被22歳休班警察Mevlüt Mert Altıntaş向他射八槍殺死。兇手行兇後大叫:「不要忘記阿勒頗!不要忘記敘利亞!」「除非我們的城鎮安全,否則你也不會享受安全。 只有死亡才能帶我離開這裡。 每個參與這種苦難的人都會付出代價!」及「真主偉大」。兇手最後被警方擊斃。

   
   
 

最衰格嘅招募藝術家廣告
今年五月,英國大型超市 Sainsbury’s登廣告「邀請」藝術家免費為佢地嘅員工食堂設計,重話可以「令你嘅作品得到認同,為你熱愛同專業留下記印」。唔使問廣告一出就變成關公災難,被全世界圍插,話佢地咁大財團都要剝削藝術家。咁最後梗係Sainsbury’s認錯收皮啦。

   
   
 

最白痴嘅藝術惡攪
今年五月係英國有四條無聊友諗到條屎橋,就係扮打刧美術館,佢地走入國立美術館同Tate Britain,攞住啲假畫攪場大龍鳳,係警察到場之前走哂,之後上載條片Youtube,諗住今次有排威。點知人算不如天算,除咗俾網友狂插佢地白痴無腦兼無聊之外,係佢地惡攪期間重嚇到一個阿婆暈咗,結果四條友齊齊俾人拉咗。最後佢地「在他們兩個參與惡作劇期間,使用威脅、辱罵或侮辱性語言或行為意圖造成恐懼,或挑起非法暴力」罪成,被判入獄16至20星期。所以話,得閒無事做咪到排幾日隊買平嘢囉,做埋啲咁低B嘅惡攪,攪到踎監都係抵死嘅。

   
   
 

最惡嘅藝術家難兄難弟組合

今年入九月係中國「銀川雙年展」因為取消艾未未的參展資格,令佢個best friend英國藝術家Anish Kapoor話:「如果繼續參展,即是與實行審查的權威勾結!」講到實牙實齒要退出雙年展杯葛,但係雙年展幕就開咗啦,Kapoor件作品重係展覽𥚃面喎,咁即係點先,又話撐你個best friend嘅?

Kapoor先生咁做都難怪佢嘅,佢見其他英國藝術家如Sean Scully、Michael Craig-Martin係強國咁揾到真銀,而家都準備大舉進軍亞洲市場(即係強國),無理由倒自己米嘅。佢而家係韓國有大型個展,係香港都有個展,擺明車馬過黎呢邊揾食。無理由為咗個best friend就得罪班米飯班主駕,你估真係同艾未未HEHE咩。

艾未未呢次被叮走無人撐,怪都只有怪佢平時做埋啲陰質嘢多,成個土豪咁聲大夾惡,惡霸咁週圍插人,去到邊啲人都怕咗佢啦。呢次連Anish Kapoor都撐唔起佢唔緊要,最緊要係惡,艾神話:「個雙年展有成70個國際藝術家,竟然無一個公開撐我(best friend Anish Kapoor就⋯算把啦)⋯(因為黎黎去去都係鬧嗰啲鬧強國嘢,呢啲嘢我地人人都識日日都鬧,毫無新意所以下刪一百字)⋯所以我好開心我唔屬於呢個政治粉飾嘅一份子⋯」

即係咁,你咁高興你俾人叮走,咁點解你開始時要攪咁大壇嘢去參加呢?強國係咁你一出世就知個喎,想返去揾食咪大家四四六六拆掂佢囉,你又唔係未做過,兩年前咪講掂數俾你留洋囉,而家係嗰邊得罪哂啲人揾唔到食又要返黎又要靠惡,唔怪之你個best friend都撐你唔落。

唔好以為Kapoor先生淨係做艾爺細佬好溫馴,佢惡起上黎都好霸度下,話說今年三月一間英國科技公司NanoSystems研究出一種全新嘅顏色,比黑色更黑嘅Vantablack。咁Anish Kapoor話同呢間公司合作咗好耐,所以將呢隻顏色霸住只有佢自己先可以用,全世界嘅藝術家都唔掂得,結果又梗係俾人圍插,但係Kapoor先生睬你都有味。

   
   
   
 

最令人類O嘴的大師作品

錄像大師Bill Viola為倫敦聖保羅大教堂創作兩件作品,第一件殉道者Martyrs已經係舊年完成,主要錄像表達四位殉道者嘅四種死法(見片),大家反應都唔錯嘅,雖然無佢以前啲作品咁勁,但大家都接受嘅。而家第二件作品終於出爐,大家期待咗咁耐,而家終於有得睇,但係個個藝評見到呢件作品後,反應都係一樣:O嘴。

個錄像叫瑪利亞(Mary),明顯係聖母嘅故事,首先見到一個光頭嘅聖母,係到母乳餵哺緊個BB(應該係耶穌),背景係美國洛杉磯。跟住另一個聖母係水上行,又有啲時間流走嘅鏡頭,最後係聖母攬住死咗嘅耶穌喊⋯

睇咗個新作之後,英國Time Out藝評人問聖保羅大教堂工作人員,呢件作品會展出幾耐?答案係「最少三百年掛」,藝評人即時感概:「原來上帝對於藝術係完全無taste嘅。」

   
 
   
▲ Martyrs_(Earth,_Air,_Fire,_Water)

最惡最霸道最歧視人嘅藝術家

行為藝術阿姐Marina Abramović又惡又貪錢又剝削員工咁多年黎我地都有報導,最近準備出版佢嘅自傳Walk Through Walls,𥚃面重表現出阿姐種族歧視嘅一面。唔知佢英文差定係編輯流,其中有段文係咁講:

「澳洲土著唔止係澳洲最老嘅民族,佢地係世界上老嘅民族。佢地個樣好似恐龍,佢地真係好古怪同好唔同,佢地應該被視為活著嘅嘅寶藏,但係無人咁做…但係同時,當你第一次見佢地時,真係好難頂下。好似,從一個西方人眼中,佢地真係好樣衰,佢地個樣真係好難係地球上揾到類似嘅;佢地有好大嘅胸膛(一個從西方文明學返黎高糖飲食嘅壞效果)同埋佢地有對牙簽腳。」

有人就問出版商攞本未出版嘅自傳黎睇下究竟係咪印錯,但係出版商就一於唔回應。但係阿姐係網上就俾人鬧爆,話佢種族歧視,重將阿姐嘅名作The Artist Is Present改埋名叫The Racist Is Present。咁阿姐唯有係Facebook「澄清」,話嗰段文字係未經改正,佢多年前寫係日記嘅原文,只係反影佢當時對澳洲土著直接嘅印象,並唔代表阿姐了解咗佢地之後對佢地嘅感覺咁話。後來又話寫日記嗰時係七十年代,嗰陣時人人多多少少都有啲種族歧視咁話。

即係咁,阿姐出名孤寒,自己英文唔掂唔該請個英文好啲嘅編輯啦,呢啲錢唔好慳啦,你咁有錢,唔係又叫你啲「免費專業員工」代辦呀?

   
 
   
 
閱讀更多TumTum的文章  
字體提高 縮小字體 列印 電子郵件 報告
Twitter Facebook Google msn 後面 安慰
網上畫廊
人氣文章
使用條款及免責聲明私隱政策聯絡我們廣告查詢
香港柴灣柴灣道238號青年廣場9樓918室  |  電話 : (852)2858-1771  |  傳真 : (852)2736-6361
電郵:tumtum.hk@gmail.com  |  版權 © 本網站所有訊息資料受香港版權法保護,未經許可不得擅自複製,分發,傳播或發行。